اولاً انا مش من الناس المعجبين باحمد حلمى , انا من الناس اللى بتموت فيه و بتحبه جدا و تتمناله الخير و النجاح ديما و من باب انى بحبه و بتمناله النجاح, ييجى نقدى لفيلم الف مبروك بهدف ان احمد يعرف عيوب و مميزات فيلم الف مبروك عشان احمد يقوى المميزات و يتلافى العيوب فى فيلمه القادم ان شاء الله
سورى انى بقول عيوب .. بس مفيش عمل كامل .. كل عمل فيه نقط ضعف و انا اقصد بعيوب يعنى نقط ضعف
انا شوفت الفيلم فى السينما و خرجت متردد هل الفيلم كويس ولا مش .. يعنى خرجت مش متأكد انى شوفت فيلم ممتاز رغم ان كل افلام حلمى خرجت منها و انا جازم انى شوفت فيلم ممتاز ..
حتى لما روحت البيت و اخواتى قالولى ايه رأيك فى الفيلم ؟ مكنتش عارف ارد عليهم ااقولهم ايه .. قولتلهم يعنى ,, فيلم حلو و قاعدت مع نفسى افكر فى الفيلم و استرجع مشاهده و كونت مجموعة افكار عن الفيلم و كنت محتاج اشوف الفيلم تانى دخلت عالنت و نزلت الفيلم نسخه مسروقه , و اتفرجت , و بمجرد نهاية الفيلم كونت رأى نهائى عن الفيلم
الفيلم فيه حاجات كتير جميله و حاجات كتير نقط ضعف نبدء بالحاجات الجميله
1 - الفيلم يحمل رسائل مهمه و حكم جميله لكل انسان .. الحكم و المعانى اللى وصلتنى محتاج صفحات عشان اعبر عنها المهم اعتقد ان الفيلم قدر يوصل المعانى دى بطريقه سهله و ممتعه بدون احساس المشاهد انه جالس يشاهد محاضره فى الاخلاق اى ان الحكم و النصائح جت بطريقه غير مباشرة و الاجمل ان مؤالف الفيلم جعل المشاهد يشعر و يتعرف على هذة الحكم بنفسه
2 - من الحاجات الجميله فى الفيلم انى شاهدت تغير فى اداء احمد حلمى فى العديد من المشاهد اى ان حلمى لم يكرر نفسه فى الاداء و هذة ميزة مهمه .. صحيح هى مشاهد مش كتير , بس جميل اوى هذا التغير الذى يكشف لنا عن أشياء جميله جديده لدى الموهوب احمد حلمى من هذة المشاهد , مشاهد الغضب فى الشارع و مع ابوه و امه و اخته و صحبه و سعيد ابن عم مريم (:
( لاول مرة نشوف حلمى متعصب بهذة الطريقه و هذة الملامح ) جميل جدا يا حلمى هذا التجديد و المشاهد التى يعبر فيها حلمى عن غضبه و رفضه من خلال حركة بيعملها بفمه تعبر عن رفض الواقع و كانه يقول طظ , جميله جدا و مشهد حلمى لما كان واقف بالعربيه جمب بتوع المخدرات و الراجل جه قاله عايز ايه , فحلمى مثل انه صايع و عايز مخدرات .. مش ممكن المشهد دا , يموت مالضحك .. اول مره اشوف حلمى يعمل الاسلوب دا و عجبنى موووت و مشهد حلمى الاخير فى المكتب و هو يتكلم مع الموظفين الجدد , عن نفسه و انه طول عمره كان بيبيع و لم يشترى الاسهم الكسبانه فى الحياه اداء حلمى فى المشهد واقعى اوى و كأن حلمى لا يمثل هذا المشهد بل يتصرف بطبيعته و ايضا هذة اول مرة اشاهد حلمى فى فيلم يتكلم بهذا الاسلوب
3 - من الاشياء الجميله فى الفيلم مشاهد الموت و مشهد حريق منير ( زميله فى العمل ) و مشاهد خبط العربيه للراجل العجوز كل هذة المشاهد تم تنفيذها با اتقان عالى جدا و على افضل ما يكون .. لكن للاسف على علمى ان هذة المشاهد تم تنفيذها على يد فريق عمل اجنبى تم استدعائه مخصوص لتفيذ هذة المشاهد 4
- من الاشياء الجميله فى الفيلم ايضا بعض الوجوه الجديدة التى لفتت الانتباه مثل صديقه و اخته و سواق التاكسى
5 - من الاشياء الجميله التى لفتت انتباهى و انتباه الجميع هى بوسترات و افيشات الفيلم , رائعه رائعه .. بجد جامده أخر حاجه اعتقد من وجهة نظرى ان هذة النقاط الخامسه هى مميزات الفيلم و هى مش قليله على فكره ام عن عيوب او نقط ضعف الفيلم
1 - شعرت بالملل على فترات متباعده اثناء مشاهدة الفيلم فى السينما من تكرار العديد من المشاهد مع اضافات قليله لم تكن كافيه للخروج من حالة الملل و بعد مشاهدة الفيلم شعرت ان الفيلم كله على بعضه كان ممكن يتلم فى ساعة زمن او أقل .. و يوصل كل اللى عايز يوصله للمشاهد بدون تكرار و ملل
2 - لم يعجبنى الأب و الأم فى الأداء أو الشكل .. و كان من الافضل الاستعانه بنجوم كبار , كانو هيفرقو فى الفيلم كتير
3 - لم تعجبنى الموسيقى التصويريه بالمره .. كما صدمت عندما سمعت موسيقى الفيلم الهندى "المليونير المتشرد" فى احد مشاهد فيلم حلمى الجديد بالتحديد المشهد الذى كان حلمى يجرى فيه بالتيشارت الاخضر و يتخيل ابوه و هو يسرق و امه تدمن و اخته مع صاحبه .. الموسيقى فى خلفيه هذا المشهد مسروقه بالنص من احدى تركات الموسيقى التصويريه الموجودة فى فيلم الهندى الملينوبر المتشرد الذى حصل على العديد من جوائز الاوسكار و جائزة الاوسكار فى الموسيقى التصويريه
4 - رغم أعجاب الكثير بمشهد قبل النهايه و حلمى يقوم بحلق شعره .. الا انى ايضا صدمت جدا , لانى هذا المشهد شاهدته من قبل اكثر من مره شاهدته فى اعلان اجنبى لفتاه صغيرة تقوم بحلق شعرها كنوع من الحب و مراعاة شعور اخوها المصاب بالسرطان الذى افقده شعره و شاهدت نفس الموقف و المشهد بالظبط فى فيلم My Sister's Keeper للنجمه كاميرون ديز و هى تحلق شعرها بالمكنه امام المرايا , من اجل اخوها المريض ..
و هذه صور من فيلم كاميرون 
5 - مشهد النهايه غير منطقى بالمره و يستخف بعقلية المشاهد .. انا لا اقصد فكرة نهاية الفيلم , فكرة النهايه منطقيه جدا و لكن مكتوبه مش كويس و تنفيذ ايضا مش كويس و أغلب من شاهد الفيلم خرج عن تركيزه و احساسه لان المشهد مش متصدق قبل ان انهى كلامى , كما ذكرت ما اعجبنى و ما لم يعجينى فى الفيلم اريد طرح بعض الاسأله التى اتمنى ان يجيبنى عليه احد ؟
1 - لماذ لم يستعين حلمى بممثل واحد معروف فى الفيلم ؟ مع العلم هذا الامر كان له تأثير سلبى على الفيلم هل حقا ما يقال اعلاميا بان حلمى استعان بهذة الفرقه كنوع من تبنى الموهب الجديده ؟ اذا كان الامر هكذا فاقول لحلمى فكرتك ممتازة و نيتك طيبه و لكن الفكرة و النيه غير كافيين لعمل فنى رائع , يجب ان تحسبها صح فى المره القادمه و اذا لم يكن الامر فكرة مساندة الوجوه الجديده , فما هى الا بعاد و النوايا من وراء هذا الامر ؟
2 - لماذ يا حلمى تقوم بعمل فيلم مقتبس فكرته من فيلم اجنبى , هذة النقطه مهما حدث و مهما كان فيلمك ناجح سوف تظل نقطة ضعف و قصور فى فيلمك ليس نقطة ضعف فى فيلمك فقط بل نقطة ضعف فى تاريخ الفن المصرى الذى سوف يسجل النجاح للفكرة الاجنبيه اتمنى منك يا احمد فى المرة القادمه ان تبحث عن فكرة و قصه من ابداع و تأليف شاب مصرى و صدقنى سوف تجد ما هو أفضل من الافكار الاجنبيه ابحث بين الشباب الموهبين فى الجامعات و المعاهد المنتظرين فرصه لظهور اعمالهم أبحث عنهم و ساعدهم كما بحثت عن الشباب الموهوبين فى التمثيل و ساندتهم فى فيلمك الجديد
3 - اذا كان هناك تقدير لفيلم الف مبروك بين المقبول و الجيد و الجيد جدا فبكل ثقه من واجهة نظرى هو فيلم جيد نعم هو أقل من أسف على الازعاج و كدا رضا .. و لكن الفيلم يحمل الضحكه و المتعه و الجمال الذى يرتقى بذوق المشاهد و الفكرة و المعنى و الرساله و الهدف الذى يرتقى بفكر المشاهد و هذا ما ننتظره دائما من أفضل ممثل فى مصر , الرائع احمد حلمـى و فى النهايه أسف اذا كان كلامى زعل حد من محبين و معجبين احمد حلمى و لكن اذا كان هناك لوم فمحدش يلوم عليا اللى عايز يلوم يلوم الفنان احمد حلمى اللى ارتقى بفكرنا و نقدنا من خلال افلامه و وصل بينا لمرحله من انتظار افلام على اعلى مستوى
